Vika 15-16: Afgangaskokkur

Þessi prjónaði afgangaskokkur tók bara svo roooosalega langan tíma að ég gerði ekkert annað í tvær vikur. Tjah eða þannig sko. Ég sem sagt ákvað að prjóna hann bara og fylgihluturinn var hreinlega að ganga frá öllum endum...ehe....
Ég fitjaði upp 324 lykkjur sem er held ég með því mesta sem ég hef fitjað upp - svei mér þá. Skokkurinn er prjónaður úr kambgarnsafgöngunum mínum en ég keypti garn í efri hlutann - átti ekki nóg garn þar sem ég vildi ekki hafa hann röndóttan þar.

Vika 14: Múltíjakki og hin ermin

Í þessari viku réðist ég loks í verkefni sem er búið að liggja í hausnum á mér í þó nokkurn tíma. Ég saumaði jakka sem hægt er að snúa inn og út og afturábak og áfram. Í verkefnunum mínum hef ég ekki verið að kaupa mikið af efnum heldur gengið á bunkann sem ég á fyrir. Ég fann í fórum mínum svart hörefni og BLEIKT ullarefni. Ullarefnið er inni í jakkanum (getur líka verið að utan) og hörefnið að utan. Sníðagerðin gekk vel - sneið efnið beint og þarf því líklega að taka flíkina í sundur þegar ég kaupi mér eitthvað flott efni ;). Saumaskapurinn gekk líka vel. Vandræðin liggja eftir allan saumaskap.... en þannig er mál með vexti að ég vil hafa smellur í flíkinni og þarf líklega um 16 smellur. Komst að því í dag að einn pakki af smellum (10stk í pakka) kostar 2500 krónur. Og þar sem ég veit ekki hvort ég noti jakkann með þessu efni....öööh auðvitað geri ég það eitthvað - en hvort ég noti hann mikið - þá tími ég eiginlega ekki að kaupa smellur í dag. Kannski kaupi ég þær á morgun.
Endaði á að kaupa minni smellur sem kostuðu 1900kr fyrir 2 pakka. Átti í smá basli með þær þar sem þær vildu ekki alveg tolla í þykka efninu en ég held að þetta hangi núna :)











Ég lauk líka við hina ermina fyrir mömmu þannig að nú getur hún farið að huga að lokum þessa prjónaskapar. Peysan er gordjös og litla systir á eftir að vera svoooo fín í henni :).

Vika 13: Síð hettupeysa og ein ermi

Í páskavikunni var saumuð síð stelpuhettupeysa/kjóll sem passar á 8-10 ára netta stelpu. Þar sem ég á enga stelpu þá þarf ég að hugsa þessa sem gjöf...hmmmm....einhverjar hugmyndir?



Ég lauk einnig við aðra ermina á peysu fyrir litlu systur - en eiginlega er það mamma sem er að prjóna peysuna. Ég kom bara til hjálpar með því að gera ermi.