Showing posts with label kage. Show all posts
Showing posts with label kage. Show all posts

Tuesday, July 17, 2012

allt í gangi

Ferðalögum engan veginn lokið þetta sumarið. Ítalía var stórkostleg og Frú Galin ferðafélagi minn sú allra besta (átti nú ekki von á öðru). Svei mér þá ef ég saknaði hennar ekki bara fyrstu dagana eftir að við komum heim. Ísland var alveg jafn dásamlegt og áður og sólríkt með eindæmum. Stefnan tekin á Gautaborg á morgun og jafnvel Kaupmannahöfn á föstudag. Kannski sólin fari að láta sjá sig almennilega hérna á hinum Norðurlöndunum takk fyrir! Líðum þó ekki D-vítamínskort eftir veruna í sólinni á Íslandinu góða og svei mér þá ef sú gula lét ekki bara sjá sig í augnablik og andartak í dag hér í Osló.

Skrifaði undir samning við danska forlagið Mellemgaard á meðan ég var á Íslandi í byrjun júlí. Þarf bara að skrifa það enn og aftur því ég á ennþá erfitt með að trúa því að þetta hafi orðið að veruleika. Undarleg tilfinning að ég nái að gefa bókina út í Danmörku á þessu ári líka.... Stressuð - kannski örlítið!  Annars er ég komin með ljósmyndara fyrir nýju bókina þannig að núna þarf ég að setja í túrbógírinn og ljúka við hlutina sem eiga að fara í myndatöku - allt í gangi, svei mér þá.

Fann annars skemmtilegt pils í Rauðakrossbúðinni á Laugaveginum og breytti því á meðan ég var á Íslandi. Pilsið varð að ótrúlega sætum bol/blússu. Ætla jafnvel aðeins að breyta meira, kemur í ljós.

Pils með áföstu undirpilsi og rennilás á hliðinni
(já já ekki besta myndataka í heimi)

Bolur/blússa

Bjó til þessa rosalegu ostaköku fyrir matarboð um daginn. Bláber, jarðarber, hindber.....mmmmm BARA gómsæt kaka. Fann uppskriftina hjá bloggvinkonu minni hér. Notaði glútenlausar kremkexkökur í staðinn fyrir oreokökur - held að enginn sem borðaði kökuna hafi liðið glútenskort!


Friday, June 1, 2012

glúten

Búin að endurheimta eiginmanninn frá Íslandi. Hann skellti sér til Íslands í viku og fór m.a. í flotta vinnuferð til Aðalvíkur. Kom endurnærður heim, alsæll með ferðina. Mamma kom til okkar (mín og strákanna) um helgina og við fengum frábært veður allan tímann sem hún tók svo með sér aftur til Íslands. Verði ykkur að góðu. Við áttum góðan tíma saman um helgina, fórum m.a. í bæinn, á kaffihús, út að borða, sátum í sólinni úti á verönd, fórum í sólbað úti í garði, horfðum á fótboltaleik..... Mamma gaf mér þessa fallegu hálsfesti eftir Hlín Reykdal - þvílík fegurð. Takk takk takk elsku mamma mín.


17 dagar og þá flýg ég ein til Mílanó. Þarf að hanga þar í 10 klukkutíma þangað til restin af gönguhópnum kemur. Jebb. Júní er mættur og ég er að fara í stelpuferðina mína til Toscana. Eins og ég skrifaði í pistli hér í lok síðasta árs þá vissi ég að á þessum tímapunkti myndi ég sjá eftir því að hafa ekki æft fyrir ferðina. Sá tímapunktur er sem sagt kominn. Ég þekki sjálfa mig svooo vel....hehe. Ég er samt tilbúin í hausnum að fara af stað og neibb sé ekki eftir því að hafa ekki æft stíft. Kannski sé ég eftir því á meðan ég er að ganga, en ég er nú ekki að hafa áhyggjur af því núna. Á eftir að redda mér nokkrum hlutum til fararinnar og á pottþétt eftir að sleppa því að kaupa létta gönguskó....af því ég á eftir að gleyma því of lengi og svo bara vúpsí er komið að ferðadegi...hmmmm!

Undanfarnar 3 vikur hef ég verið á glútenlausu fæði. Tilraunaverkefni þar sem ég hef verið að reyna að finna leið til að hætta að vera svona þreytt og illt í öllum liðum og vöðvum. Járnleysið hefur lítið batnað síðan í janúar (þegar ég náði sögulegu lágmarki í járnbúskap) þrátt fyrir að hafa tekið tvöfaldan skammt af járni frá því í janúar. Fyrir viku síðan ákvað ég að minnka járnskammtinn í einfaldan því - jebbs - mér líður miklu betur. Ég er ekki stíf og stirð eftir göngutúrana, get staðið upprétt þegar ég fer á fætur á morgnanna (eða stend upp úr sófanum), get beygt fingur án verkja........ Tilraunin átti að vera til fjögurra vikna og ég er spennt að sjá hvernig heilsan er eftir eina viku (ábyggilega miklu miklu betri). Ég hef jafnvel verið að gæla við að fara út að skokka - en passa mig á að anda djúpt þegar ég fæ þá hugmynd, fá mér kaffisopa og gleyma svo hugmyndinni hahahahaha (vá hvað mér finnst leiðinlegt að hlaupa). En fyrir þá sem eru núna orðnir grænir af öfund af því þeir halda að ég sé orðin 1.74 og 90-60-90 þá geta þeir sömu andað léttar. Eins og áður hefur ekkert gramm ákveðið að yfirgefa minn frábæra líkama þrátt fyrir þessa skemmtilegu tilraun. Hinsvegar er ég pottþétt hrikalega holl að innan - allavega í smáþörmunum - því þeir eru farnir að taka járnið meira inn í systemið en áður - júhú.

En varðandi glútendæmið - það er glúten í öllu, eða þannig. Ekki vissi ég að það væri hægt að kaupa glútenlaust mjöl (hveiti) og glútenlaust pasta.....svei mér þá - það er bara allt til. Þar sem synirnir eru alltaf frekar skeptískir þegar kemur að matar- og kökugerð heimilisins (finnst þetta aðeins of hollt) og kalla allt speltmat (mjög hallærislegt að vera með speltmat - þó það sé ekkert spelti í matnum hehe) - þá eru þeir núna illa haldnir af því að allt verði glútenlaust á heimilinu (án þess að vita almennilega hvað glúten er).... Þessi blessuð börn.

Er annars alltaf að detta á skemmtilegar uppskriftir og í gær bjó ég til bountynammi sem fer beint í flokkinn með hrásnickerskökunni - namminamm. Uppskriftina fékk ég hér og nafna mín hún Elin er svo sannarlega með fullt af góðum og skemmtilega hollum uppskriftum.

Kakósmjör, lukuma, kakó, vanilla.

Kókosmjöl, sukrinmelis og kókosmjólk.




Ég átti afgang af súkkulaðinu og hellti því í konfektform og bætti
einni heslihnetu í hvert hólf.


Thursday, March 29, 2012

ég óska mér

Ég óska mér að verða gömul. Jebb mig langar að verða gömul eins og amma mín og nafna. Þegar ég verð gömul ætla ég að verða nákvæmlega eins og hún. Ég ætla að vera lítil með hvítt hár, alltaf í góðu skapi þó ég muni ekki lengur allt og gleymi nánast öllu. Alltaf hlæjandi og flissandi og ég ætla að elska súkkulaði og sælgæti alveg eins og hún amma mín.

Í dag skrapp ég í göngutúr heiman frá mér yfir á Bogstadveien sem er flott verslunargata hérna í Osló. Ég bjó við þessa verslunargötu fyrstu 2 mánuðina mína hérna í borginni. Ég var svo heppin að fá mömmu og O og mágkonu hennar mömmu IL í heimsókn um miðjan mars og þegar við fórum í H&M fengum við 50nok gjafakort í hvert skipti sem við versluðum. Ég átti því 4 gjafakort í dag eða 200nok til að eyða í H&M. Ekki leiðinlegt það.
Þegar ég var á  heimleið kom ég við í fallegustu skóbúðinni í bænum, Lille Vinkel Sko. Í þessari búð er hægt að finna skó frá Chie Mihara - sem ég elska. Á undan mér inn í búðina fór gömul hvíthærð kona með göngugrind. Ég hugsaði að þetta gæti verið ég þegar ég er orðin gömul. Ein af afgreiðslustúlkunum hélt dyrunum opnum fyrir gömlu konunni en gleymdi að segja henni að það væri eitt þrep niður.... Konan lenti kylliflöt á gólfinu með hnéð fyrst og svo hnakkann í gólfið. Blóð út um allt. Váh hvað það getur blætt mikið úr hnénu á svona gamalli konu. Hausinn slapp við gat en mikið ofsalega átti gamla konan bágt. Hún vissi ekkert hvar hún var og var greinilega vönkuð. Það liðu ekki 3 mínútur og þá var sjúkrabíllinn mættur á staðinn........ Eftir þetta fór ég að hugsa. Þegar ég hugsa um að verða gömul þá gleymi ég alltaf að hugsa að ég get verið ógurlegur hrakfallabálkur....jebb....ég hef í alvörunni legið kylliflöt oft og mörgum sinnum og þá yfirleitt vegna skófatnaðar......hmmmmm....ég ætla samt innilega að vona að ég komi ekki til með að detta svona í fallegri skóbúð hátt á níræðis aldri!

Skellti í nokkrar mini bollakökur þegar ég kom heim úr bæjarferðinni og bakaði bláberjakökur með bláberjakremi. Mmmmmm þessi samsetning er alveg að virka.


Við erum í teppagírnum þessa dagana. Keyptum teppi inn í stofu og það er 100% vistvænt sem mér finnst alls ekki svo galið (eins og þið kannski eruð búin að reikna út). Við gerum okkur grein fyrir því að það hefði verið miklu betra að hafa keypt það aðeins fyrr þegar mínusgráðurnar voru jafnmargar inni og úti í vetur ehemmm. En í staðinn verður bara enn hlýrra næsta vetur. Það er þó einn sem er mest ánægður með nýja teppið og átti erfitt með að bíða eftir að það var komið á réttan stað.


Enginn fótbolti í sjónvarpinu mínu í kvöld - er farin að glápa á sápurnar.

Monday, March 26, 2012

dagarnir líða

Heilmikið búið að gerast síðan í Kína - eiginlega svo mikið að ég bara hreinlega man það ekki ehemm! Ég skrapp í húsmæðraorlof (og kynningarstarf vegna bókarinnar) til Stavanger í vikunni. Það var svo gott að knúsa vinkonu mína og svo fékk ég kynningu á borginni - ekta áfangi Stavanger0313 fyrir framhaldsnemendur.... Litla systir átti afmæli um helgina og ég saumaði handa henni afmæliskort og sendi til Barcelona í síðustu viku.

Í pakkanum var líka m.a. sæt chilisulta sem ég afrekaði að búa til í þarsíðustu viku en miðana á sultuglösunum fékk ég einmitt frá sætu systur í afmælisgjöf í fyrra.


Við skelltum okkur í Grünerløkka á laugardaginn af því mig "vantaði nauðsynlega" mottu undir eldhúsborðið og eiginlega hefði hún þurft að koma í vetur þegar ég var að frjósa á tásunum.....í staðinn frýs ég ekki á tásunum næsta vetur. Keypti stóra House Doctor mottu og var ótrúlega heppin að hún var BARA til í bleiku.

Á leiðinni í mottuleiðangurinn varð ég fyrir þessu kertahúsi. Það hreinlega henti sér í andlitið á mér og ég kunni bara ekki við annað en að taka það með heim - var á fáránlegu tilboði sem var "alls ekki" hægt að sleppa. 

Ég réðist svo í framkvæmdir í dag en það hefur legið fyrir í nokkurn tíma að ég ætla að búa til borð úr júrópalla. Fann einn fyrir einhverjum mánuðum síðan hérna fyrir utan og dró draslið heim yfir snjóskaflana en hann er búinn að þorna vel og vandlega síðan þá. Í dag skellti ég svo sandpappír á viðinn og grunnaði með hvítum. Svo er bara að velja lit og henda hjólum undir. Hef ætlað að búa svona til í mörg ár og núna er tækifærið.




Annars hefur aðeins verið bakað hérna og í gær var t.d. stóri vöffludagurinn í Noregi. TAE (nr.30) skellti sér á einn fótboltaleik og liðið hans vann 3-0. Alltaf gaman þegar vel gengur í boltanum.


Ég steikti pönnukökur í tilefni sumartímans og við dekkuðum borð úti á veröndinni okkar. Hlakka til að eyða meiri tíma þar í sumar. Eru þið kannski að spá í að koma í heimsókn?


Rjómaleginn Kófú

Núna er það bara afslöppun næstu kvöld með prjónana en það er víst kominn tími á peysu fyrir mig og ég fitjaði upp á henni í gærkvöld.

Friday, January 27, 2012

járnkonan

Ljósakanínan mín í eldhúsglugganum hefur eignast unga. Ég sé það bara á henni hvað hún er hamingjusöm með ungana sína, verst samt að þeir skipta litum ef það er kveikt á þeim. Líklega tengist það bara stærðinni á þeim - ætli það eigi eftir að eldast af þeim?


Tjéllingin er enn meðetta - jebb slær í gegn hvað eftir annað í árlegu blóðprufunum. Fékk símtal frá lækninum í dag þar sem ég var beðin um að bryðja járn út í eitt. Alvarlegur járn- og blóðskortur í gangi.....mér finnst þetta vera flassbakk.....ég er "alltaf" að lendíssu. Í gær gaf ég mér sem sagt blóðprufu í afmælisgjöf. Gaf mér líka hlaup og göngu á brettinu í BareTrening úti á horni (tók nú Dr. Voltarol með þar sem rófan er ekkert alveg að samþykkja brettið eða hreyfingu almennt ehemm). Fór í langa heita sturtu og lakkaði neglur - jebb best að taka þetta alla leið fyrst maður er að eldast svona á milli ára!

Svo bakaði ég GULA köku af því gular kökur eru GLAÐARI kökur en aðrar kökur. Þeim yngsta á heimilinu fannst að kakan ætti að vera röndótt og afmæliskonan valdi því svartan, gulan og bleikan lit. Notaði í fyrsta skipti sykurmassa og það gekk svona súper vel. En svona sykurmassi er alltof sætur, ef út í það er farið, reikna ekki með mikilli notkun - finnst þetta ekkert alltof gott....fjúff. Einnig var óskað eftir lakkrísbollakökum og því voru bakaðar nokkrar minicupcakes.







Sá yngsti kom svo færandi hendi heim úr skólanum en hann gaf mömmu sinni lakkrís sem er allra besta nammið í öllum heiminum - sama hvernig lakkrís það er. Áður hafði ég fengið flottustu tölvutösku í heimi sem hann saumaði sjálfur í skólanum.



Eiginmaðurinn kom svo færandi hendi með blóm handa frúnni þegar hann kom heim úr vinnunni. Aldrei of oft sem maður fær blóm. Þetta voru margrétarblóm - þið vitið þessi hvítu með gulu miðjunni.....elska þau.

Í vikunni kom svo washi límbandið sem ég pantaði á etsy um daginn. Hef ekki grænan grun hvað ég ætla að nota það í - en krúttlegt er þetta.


Pósturinn kom með tilkynningu um pakka í gær. Ég fór því spennt að ná í pakkann í dag og varð svo sannarlega ekki fyrir vonbrigðum (eins og ég myndi einhverntíma verða það ef ég fengi pakka - uuuh neits). Í pakkanum frá bestu systur í Barcelona var sætasti te-apinn og falleg og litrík gúmmífiðrildi til að setja á glös.


Ég er að segja ykkur, te-ið bragðast MIKLU betur eftir að apinn mætti á svæðið.

Saturday, January 21, 2012

fiðrildi í maganum

Þá er bókin farin í prentun. Hvað skal segja.....ég er allavega með fiðrildi í maganum.


Í vikunni bakaði ég möffinsin hennar Ebbu með Pálmasykri og Lucumadufti. Framandi orð í mínum eyrum - en mikið rosalega voru möffinsin góð á bragðið. Runnu ofan í drengina og alveg á hreinu að þessar verða bakaðar aftur.

Ég er að lesa svo margar bækur þessa dagana að ég bjó mér til nokkur bókamerki úr umslögum sem detta hér í póstkassann nokkrum sinnum í viku. Sum brenni ég en datt í hug að nota nokkur í bókamerki.


Hér snjóar og snjóar og á miðnætti í gær voru tölurnar þessar


Í morgun voru tölurnar þessar


Annars er "rófan" alveg að taka sinn tíma í að lagast. Gengur hægt (að mínu mati) en ég er þó samt farin að geta farið í lengri göngutúra - þó ég fari hægt um.....

Friday, November 18, 2011

Þú ert frábær!

Þessi dagur er helgaður mér sjálfri, Sigríði Klingenberg, Secret og Louise L. Hay. Ég sit og hlusta á "Þú ert frábær" með Siggu Kling. Ég ætla að fletta upp nokkrum góðum ráðum úr bókinni "I CAN DO IT" eftir Louise L. Hay. Á pottþétt eftir að lesa valda kafla í "Secret" bókinni. Í dag er ég að vinna að verkefni sem ég ætla mér alla leið með.


Í gær komu hingað 5 flottar skvísur og ég sýndi þeim hvernig ég festi myndirnar á kerti. Ég bakaði líka í tilefni dagsins enda var þetta hinn skemmtilegasti saumaklúbbur :D. Ég er algjörlega dottin í að gera minicupcakes þegar ég baka bollakökurnar. Það er í raun það eina sem maður þarf - lítil kaka með kaffinu. Mér reiknast til að í einni slíkri eru 135 hitaeiningar. Hvað ætli séu þá margar hitaeiningar í venjulegri cupcake ehemmm ;). Í þetta skiptið bakaði ég vanillubollaköku með vanillukremi og cappuchinoköku með cappuchinokremi.



Brauðvélin (jólagjöfin frá mömmu) er að slá í gegn. Í fyrrakvöld var hún vígð og fékk að hnoða og hefa deigið í pítubrauðin. Í gær bakaði hún danskt rúgbrauð fyrir okkur. Ég ELSKA þessa vél :D.

 Pítubrauð úr bókinni "Af bestu lyst"


7dl hveiti
1dl heilhveiti
1dl sesamfræ
1 tsk salt
1 tsk sykur
2 1/2tsk þurrger
3dl volgt vatn




Og heimatilbúna pítusósan sló í gegn.

Heimatilbúin pítusósa


150g sýrður rjómi eða hrein jógúrt
1 tsk hlynsíróp
1 msk oreganó
1 stk hvítlauksrif
graslaukur, klipptur
hnífsoddur af chilipipar
nokkur saltkorn



Tuesday, November 15, 2011

Barcelona og Facebook

Yndislegir dagar í Barcelona. Skólapartý. Rölt um Gracia hverfið. Fullorðnir, börn og hundur knúsuð í kaf. 8 ára afmælisveisla. Er hægt að biðja um meira?

Kokomo

8 ára afmælisdrengurinn að undirbúa bæjarferð - best að hafa aura í vasa.

Úti að rölta með litla ferfætlinginn.

Krakkarnir sáu um að skreyta þessar fínu möffins fyrir afmælið.

Frænka var beðin um HULK köku og afmælisdrengurinn valdi þessa fyrir veisluna.

En honum fannst þessi flottari svo við fengum hana á sjálfan afmælisdaginn :D

8 ára strákurinn

Næstum 12 ára pæjan

Ég ætla að taka pásu frá Facebook í nokkra daga - kannski lengur. Þetta fyrirbæri er tímaþjófur þó ég noti þennan samskiptavef mikið til að tala við fjölskylduna mína sem er langt í burtu. Það er bara svo auðvelt að gleyma sér í engu - vera upptekin af því að kíkja á fésið til að athuga hvort einhver sé inni til að spjalla eða ekki. Detta í einhver (oft) ömurleg vídeó eða lestur á misgóðum blaðagreinum. Þannig að PÁSA er það. Ef einhver þarf nauðsynlega að ná í mig þá er ég með emailinn eplammm@gmail.com og svo er ég líka með íslenskan heimasíma sem er fjórirníuníututtuguogsjötuttuguogþrír :D
Ég er þó ekki hætt að blogga.